DMO IPAPADALA SA SINGAPORE

Labing apat (14) na miyembro ng Disaster Management Office (DMO) ang ipadadala ng Pamahalaang Panlungsod ng Olongapo sa Chang Hai Village, Singapore para sa gaganaping Asian Regional Disaster Simulation Exercise (ARDEX).

Upang lalong mapaigting ang kalidad ng kakayanan ng mga miyembro ng DMO, ang mga piling kasapi ng Subic Bay Metropolitan Authority (SBMA) at Olongapo City Fire Rescue Team (OCFRT) ay lalahok sa nasabing Disaster Simulation Exercise sa Singapore nitong darating na Oktubre 2007.

Kaugnay nito, buong pagmamalaki ipinakilala ni City Mayor James “Bong” Gordon, Jr. sa Flag Raising Ceremony sa Rizal Triangle Multi-Purpose Center ang mga kinatawan ng DMO na dadalo sa nasabing simulation exercise.

“Sa pamamagitan ng simulation exercise na ito ay mas mapag-iibayo natin ang awareness ng ating Rescue Team lalo sa panahong kakailanganin natin sila”, pahayag ni Mayor Gordon sa harap ng mga city officials at employees.

Sinabi pa ni Mayor Bong Gordon na ang hakbang na ito nang City Government ay bahagi pa rin ng mga panlipunang programa ng lungsod upang mas mapangalagaan at masiguro ang kaligtasan ng mga mamamayan ng Olongapo.

Gaganapin ang Asian Regional Disaster Simulation Exercise sa Oktubre 22–24, 2007.

Binigyang komendasyon ni Mayor Bong Gordon ang bumubuo ng Disaster Management Office (DMO) para sa maagap na pagtugon sa mga na-apektuhang residente ng Olongapo sa nakaraang bagyong Dodong. Kabilang rin sa mga binigyang komendasyon ni Mayor Gordon ay ang tanggapan ng PUD, CSWDO, City Health, PNP, Office of Traffic Management.

PAO/jpb

BUWAN NG HULYO BILANG CONSCIOUSNESS MONTH

Ang Pamahalaang Lokal ng Olongapo sa pamumuno ni City Mayor James ‘’Bong’’ Gordon, Jr. sa pamamagitan ni Disaster Management Office Head Angie Layug ay isa-isang nilatag nitong ika-7 ng Hunyo 2007 sa FMA Hall ng City Hall ang ibat-ibang aktibidad kaugnay sa pagsalubong ng Lungsod ng Olongapo sa National Disaster Consciousness Month ngayong buwan ng Hulyo.

Kabilang na sa mga aktibidad ay ang malawakang motorcade na isasagawa sa ika-2 ng Hulyo 2007. Muling magsasanib pwersa ang ibat-ibang sangay ng Subic Bay Metropolitan Authority (SBMA) kasama na ang Bureau of Fire sa motorcade na tatahak sa mga pangunahing lansangan ng Freeport at Olongapo na bitbit ang 2007 theme na ‘’SAFE KA BA? Programa Laban sa Kalamidad Tungo sa Pag-unlad’’.

Layunin ng National Disaster Consciousness Month at ng motorcade na pukawin ang interes at kaisipan ng mamamayan sa kahalagahan ng paghahanda sa lahat ng sakunang hinde inaasahan na maaaring dumating sa hinaharap.

Matatandaan, na ang Olongapo sa pamamagitan ng Disaster Management Office (DMO) ay kinikilala ngayon sa bansa na may mabilis na responde sa panahon ng sakuna bunga na rin ng mga patuloy na isinasagawang pagsasanay sa mga pribado at pam-publikong ahensiya at ng mga Olongapeños.