WELDERS NG GAPO, IPADADALA SA AUSTRALIA

Dalawang daang (200) mga nakapasang welders ang ipadadala ng Lungsod ng Olongapo sa Australia sa pamamagitan ni City Councilor Edwin Piano at suporta naman ni Mayor James “Bong” Gordon, Jr.

“I’m very glad that the welding training being provided by my administration through City Councilor Piano is bearing fruit as manifested by the employment opportunities, in both local and international arena, given to our former trainees,” pahayag ni Mayor Gordon.

Magugunitang marami na ang mga “former trainees” ng Welding Program ng Pamahalaang Lungsod, lalaki man o babae, ang nabigyan ng pagkakataong makapagtrabaho sa iba’t ibang kumpanya, sa ibang bansa man o lokal. 2058 sa mga “graduates” ng Mayor Gordon Welding Academy ang nagtratrabaho na sa Hanjin, ang itinuturing na pinakamalaking “ship building company” sa buong mundo.

Samantala, inihayag ni Mayor Gordon na maraming mga lokal na pamahalaan ang nagnanais magpadala ng kanilang mga constituents sa Olongapo City upang maging trainees ng Olongapo City Government’s Welding Training Program. Kaugnay nito ay hinikayat ni Mayor Gordon ang mga Olongapeño na magmadali sa pagpapasa ng kanilang aplikasyon upang maging “trainees” dahil na rin sa kagustuhan niya na tulungan muna ang kanyang mga kababayan bago ang iba.

Tuloy tuloy pa din ang pag-arangkada ng Welding Training Program ni Mayor James “Bong” Gordon, Jr. sa pamamagitan ni Kgd. Piano. Sa iba pang detalye ay maaaring makipag-ugnayan sa tanggapan ni Piano sa Sangguniang Panlungsod ng Olongapo City Hall o tumawag sa telepono bilang 224-8390 loc. 4229 0 4246.

PAO/jms

DMO IPAPADALA SA SINGAPORE

Labing apat (14) na miyembro ng Disaster Management Office (DMO) ang ipadadala ng Pamahalaang Panlungsod ng Olongapo sa Chang Hai Village, Singapore para sa gaganaping Asian Regional Disaster Simulation Exercise (ARDEX).

Upang lalong mapaigting ang kalidad ng kakayanan ng mga miyembro ng DMO, ang mga piling kasapi ng Subic Bay Metropolitan Authority (SBMA) at Olongapo City Fire Rescue Team (OCFRT) ay lalahok sa nasabing Disaster Simulation Exercise sa Singapore nitong darating na Oktubre 2007.

Kaugnay nito, buong pagmamalaki ipinakilala ni City Mayor James “Bong” Gordon, Jr. sa Flag Raising Ceremony sa Rizal Triangle Multi-Purpose Center ang mga kinatawan ng DMO na dadalo sa nasabing simulation exercise.

“Sa pamamagitan ng simulation exercise na ito ay mas mapag-iibayo natin ang awareness ng ating Rescue Team lalo sa panahong kakailanganin natin sila”, pahayag ni Mayor Gordon sa harap ng mga city officials at employees.

Sinabi pa ni Mayor Bong Gordon na ang hakbang na ito nang City Government ay bahagi pa rin ng mga panlipunang programa ng lungsod upang mas mapangalagaan at masiguro ang kaligtasan ng mga mamamayan ng Olongapo.

Gaganapin ang Asian Regional Disaster Simulation Exercise sa Oktubre 22–24, 2007.

Binigyang komendasyon ni Mayor Bong Gordon ang bumubuo ng Disaster Management Office (DMO) para sa maagap na pagtugon sa mga na-apektuhang residente ng Olongapo sa nakaraang bagyong Dodong. Kabilang rin sa mga binigyang komendasyon ni Mayor Gordon ay ang tanggapan ng PUD, CSWDO, City Health, PNP, Office of Traffic Management.

PAO/jpb