PAGBABAWAL SA BANDALISMO HIGIT PANG-PALALAKASIN

Higit pang pa-iigtingin ni City Mayor James ‘’Bong’’ Gordon, Jr. ang kampanya laban sa mga walang pakundangang nagsasagawa ng vandalism o grafitti sa Lungsod ng Olongapo.

Ang mga vandals na kadalasay kabataan na gumagala sa dis-oras ng gabi sa lansangan na nagsasagawa ng pag-susulat sa mga pader, puno at tanggapan gamit ang spray, marking pen o pintura ay maaaring hulihin sa akto ng barangay officials o pulis.

Pina-alalahanan rin ni Mayor Bong Gordon ang mga magulang na bantayan ang kanilang mga anak partikular na ang mga menor-de-edad dahil kung sino man ang mahuhuling gumagawa ng bandalismo ay masasangkot rin ang mga magulang o guardian dahil sa kapabayaan.

Matatandaan na nag-alok na ang Pamahalaang Lokal ng limang libong pisong (P 5,000) pabuya sa mga makakapag-turo sa mga vandals upang higit na mapabilis ang pagsugpo sa mga naninira ng kalinisan at kaayusan ng ari-ariang pribado man o pam-publiko batay na rin sa nakasaad sa City Ordinance # 7 (Series of 1967) na nagbabawal sa vandalism o grafitti.

Sa mga makakapag-bigay ng impormasyon sa mga gumagawa ng vandalism ay maaaring tumawag sa telepono bilang 222–2565/222-2206/222-2232 o kaya’y makipag-ugnayan sa Mayor’s Office para sa detalye.