FREDDIE AGUILAR, “ANAK” NG GAPO

Unang nakilala sa mundo ng musika si Freddie Aguilar nang sya ay lumahok sa Metro Manila Popular Music Festival noong taong 1978. Pagkatapos maiparinig sa unang pagkakataon ang kanyang komposisyon na “ Anak” sa nasabing kompetisyon, siya na ang naging pinakapopular na musikero sa Kamaynilaan noong mga panahong iyon at napatunayan din nyang isa siya sa pinakamagaling na musikerong Pinoy na nakilala sa buong mundo sa mga sumunod pang taon.

Ang komposisyon nyang “Anak” na orihinal na ginawa sa Tagalog ay naisalin sa wikang Japanese, Cantonese, Malay, Mandarin, French, Spanish, Italian , English at iba pang lenggwahe . Umabot sa 6 na milyong kopya ng nasabing kanta ang naibenta sa Pilipinas at sa buong mundo. Tinangkilik din ng publiko ang kanyang mga komposisyon tulad ng Magdalena, Katarungan, Bayan Ko, Bulag, Pipi at Bingi, Estudyante Blues, at ang kantang “Olongapo” na tumatalakay sa mga socio-political issues ng iba’t-ibang panahon.

Bilang isang kinikilalang musikero, nakatanggap na ng mahigit-kumulang sa 30 iba’t-ibang musical awards si Freddie Aguilar at nakapagtanghal na rin sya ng 30 international concerts kabilang na sa Amerika, England, China, Germany at Japan.