LABANANG PACQUIAO VS MORALES III SA ‘GAPO!

Matutunghayan ng mga boxing enthusiasts ng lungsod ang inaantabayanang laban ng pambato ng Pilipinas na si Manny ‘’Pac Man’’ Pacquiao at Eric ‘’El Terrible’’ Morales ng Tijuana, Mexico.

Ang 12-round super featherweight bout na magaganap sa Thomas & Mack Center in Las Vegas, Nevada, USA ay libreng mapapanuod sa ika-19 ng Nobyembre 2006, alas-8 ng umaga sa Rizal Triangle Covered Court.

Sa inisyatiba ni City Mayor James ‘’Bong’’ Gordon, Jr. ay maglalagay ng dalawang (2) 56’’ at dalawang (2) 42’’ television sa stage ng covered court at monoblock chairs para sa maayos at komportableng panonood.

Ang labanang Pacquiao-Morales III ay hatid ni Mayor Bong Gordon sa mga residente ng Olongapo na walang telebisyon sa tahanan o kaya’y nais maramdaman ang excitement in big screen kasama ang malaking crowd.

‘’Ang laban ni Pacman ay hindi lamang laban ng iisang Pilipino. Suportahan natin si Manny Pacquiao dahil ang kanyang tagumpay ay tagumpay ng sanbayanan,’’ wika ni Mayor Bong Gordon.

Sa ngayon ay puspusan na rin ang paghahanda ng lokal na pamahalaan sa pamamagitan ni Dr. Donald Vigo na syang coordinator sa pagse-set-up ng naglalakihang television set sa pakikipag-tulungan ng Ocampo’s Olongapo at COLORVIEW CATV, Inc.