TRAINING PROGRAM FOR YOUNG LEADERS, ISASAGAWA SA JAPAN

Ang Office of Asian and Pacific Affairs (ASPAC) ng Department of Foreign Affairs (DFA) ay nagsisimula nang tumanggap ng mga aplikante sa gaganaping Training Program for Young Leaders (TPYL) sa Japan. Ang nasabing training ay may dalawang kategorya: ang Economic Development Category, na gaganapin sa ika 10 hanggang sa ika-27 ng Nobyembre at ang Information Communication Technology (ICT) na gaganapin naman sa ika-13 hanggang ika-30 ng Oktubre 2008.

“Ang oportunidad na ganito ay hindi dapat pinalalampas ng mga kabataan dahil dito, magkakaroon sila ng mas sapat at mas mainam na karanasan at kaalaman upang maging mga susunod na lider ng bayan,” pahayag ni Mayor James “Bong” Gordon Jr.

Sinimulan ng Japan International Cooperation Agency (JICA), na siyang magsasagawa ng naturang training, noong 2007 ang pagbibigay ng training sa mga susunod na ‘nation-builders’ ng mundo. Iniimbitahan nila ang mga kabataan upang malinang nila ang kanilang mga kakayanan na magkaroon ng mga bagong kaalaman at karanasan.

Ang mga aplikante ay dapat na 20-35 taong gulang, physically at mentally fit, hindi pa nakapunta o tumuloy sa Japan, may kinalaman sa aaplayang kategorya, preferably, may permanenteng posisyon na sa loob ng dalawang (2) taon at walang kasalukuyang aplikasyon sa ilalim ng isa pang scholarship program.

Para sa karagdagang impormasyon o pag-sumite ng aplikasyon, maaring pumunta sa Olongapo City Hall sa Mayor’s Office.

PAO/Don