Iwas-Paputok, Kampanya ng City Gov’t.

Muling nangangampanya ang Lungsod ng Olongapo sa pangunguna ni Mayor Bong Gordon para sa mapayapa at “iwas-paputok” na pagdiriwang ng kapaskuhan at pagsalubong sa bagong taon.

Kaugnay nito ay mariing ipinaaalala ng lungsod sa mamamayang Olongapeño ang pagbabawal sa paggamit ng malalakas na paputok upang maiwasan ang pinsalang maaaring idulot nito.

Sa kanyang pahayag, sinabi ni Mayor Gordon na hindi kinakailangan ang paggamit ng mga paputok para ipagdiwang ang kapaskuhan. Aniya, ang pagbabawal sa paggamit ng mga delikadong fire crackers ay upang masigurong walang Olongapeñong mapapahamak dahil sa mga ito.

Samantala, magpapakalat na rin ng mga Anti-Firecracker campaign posters and tarpaulins ang city government upang laging mapaalalahanan ang publiko.

Ang mga lugar na partikular na pagkakabitan ng mga Anti-Firecracker campaign materials ay ang City Hall, City Mall, City Public Market, James L. Gordon Avenue Market and Mall, East Bajac-Bajac Bridge Railings, Rizal Triangle Multi-Purpose Covered Court, James L. Gordon Memorial Hospital, Kalaklan Area, Barangay Mabayuan, Brgy. Barretto, Barangay Sta. Rita, Barangay New Cabalan at maging sa mga pampublikong paaralan.

Ang pagbabawal sa paggamit ng mga delikadong paputok ay sang-ayon sa City Ordinance No. 55 (Series of 1996) na nag-amyenda sa Section 4 ng City Ordinance No. 5 (Series of 1959) o Prohibition on the firing, explosion or discharge of firecrackers.

PAO/jpb