KULONG AT MULTA SA CABLE TAMPERING

Ipinasa na kamakailan ng Sangguniang Panlungsod ng Olongapo ang ordinansa na kakastigo sa mga di-otorisadong indibidwal at kumpanya na mapapatunayang gumagawa ng illegal na service connections ng telepono, internet at cable tv.

Pagmumultahin ng dalawang libong piso (P2,000.00) o pagkabilanggo ng tatlumpong (30) araw ang sinumang mahuhuli sa unang pagkakataon na gumagawa ng mga illegal na koneksyon, samantalang tatlong libong piso (P3,000.00) naman o apatnapu’t limang (45) araw na pagkabilanggo ang ipapataw sa mga mahuhuli sa pangalawang pagkakataon at limang libong pisong (P5,000.00) multa o animnapung (60) araw na pagkabilanggo para sa mahuhuli sa pangatlong pagkakataon.

Tinukoy din sa ordinansa ang mga violations kaugnay ng unauthorized tampering ng mga telecommunication lines, particular dito ang: (1) intensyunal na pagkakabit ng di-otorisadong koneksyon sa mga existing lines ng CATV, internet at telepono; (2) di-otorisadong pag-extend ng telecommunication lines ng mga subscribers; (3) pag-install ng mga putol na linya; (4) paggamit ngmga company-supplied materials ng mga telecommunication companies sa illegal na pamamaraan; at (5) pagmo-modify ng mga kagamitan mula sa mga nabanggit na service providers.

Samantala, ang mga kumpanya naman na naghahatid ng mga telecommunication services na may mamamataan na nagta-tamper ng illegal na koneksyon ay maaaring makipag-ugnayan sa mga barangay officials ng lugar upang magsagawa ng imbestigasyon.

Ang ordinansang ito ay epektibo na sa kasalukuyan mula pa sa pagkakapasa nito sa Sanggunian noong Pebrero 2007.


PAO/jpb