Bakuna Kontra Tigdas

Magsasagawa ng “Door-to-Door Measles Elimination Campaign” ang City Health Office (CHO) ngayong Oktubre hanggang Nobyembre 2007.

Upang maisakatuparan ang adhikain ni City Mayor James ‘’Bong’’ Gordon, Jr. para sa maayos na kalusugan ng mga Olongapeño, buo ang kanyang suporta sa programang kontra-tigdas ng CHO.

Simula ika-15 ng Oktubre hanggang ika-15 ng Nobyembre 2007, magba-bahay-bahay ang mga kawani ng CHO upang magbigay ng libreng bakuna laban sa tigdas para sa mga bata sa Olongapo na may gulang siyam (9) na buwan hanggang apat (4) na taon.

Layunin ng programang ito ng CHO na masigurong ligtas ang mga batang Olongapeño laban sa sakit na tigdas. Ang bakunang ibibigay nito ay makatutulong upang palakasin ang Immune System ng katawan ng mga bata sa gayon ay maiwasan ang anumang panganib dulot ng tigdas.

Bukod sa bakuna ay mamimigay rin ang CHO ng libreng Bitamina A at gamot pampurga para sa mga bata.

Para sa mga nais mag-avail ng serbisyong ito, abangan lamang ang mga “Bakuna Doors” sa inyong lugar o kaya’y magtungo sa pinakamalapit na health centers.

PAO/jpb