GAPO AT SBMA MAGKATUWANG SA PAG-UNLAD

Nagharap ang mga department heads ng Olongapo City at Subic Bay Metropolitan Authority (SBMA) para sa 2nd Consultative Meeting na isinagawa sa FMA Hall ng City Hall nitong ika-11 ng Marso 2008.

Pagsulong para sa mas maunlad na Olongapo at Subic Bay Freeport Zone (SBFZ) ang pangunahing mga tinalakay sa naturang pulong. Kasama na rito ang ilang mga proyekto na pagtatambalan ng lungsod at SBMA.

Pinangunahan nina Mayor James “Bong” Gordon, Jr. at SBMA Administrator Armand C. Arreza ang naturang consultative meeting, kasama sina Vice Mayor Cynthia Cajudo at City Administrator Ferdie Magrata.

Una sa mga naging agenda sa pulong ang planong pansamantalang pagsasara sa motor vehicles ng SBFZ main gate bridge para sa napipintong re-konstruksyon nito. Tinalakay na rin ang posibleng pagbabago sa trapiko sa apektadong lugar oras na simulan ang naturang proyekto.

Sa halip na sa Ramon Magsaysay, malapit sa main gate ng Freeport ay malilipat ang loading at unloading area ng mga pampasaherong jeep sa harap ng James L. Gordon Memorial Hospital sa may Rizal Avenue.

Tinalakay rin sa pulong ang Joint Olongapo City –SBMA Environmental Project partikular ang posibilidad na pag-develop ng SBMA sa Olongapo landfill. Kolaborasyon naman sa pagitan ng lungsod at SBMA ang kasama pang pinag-usapan kaugnay sa road planning, expansion of SBFZ at preparasyon para sa nalalapit na Philippine Olympic Festival na gaganapin dito ngayong Abril 2008.

Naniniwala ang magkabilang panig na higit na iigting ang implementasyon ng mga programa at proyekto ng SBMA at Olongapo kung magpapatuloy ang lalo pang tumatatag na ugnayan sa pagitan ng dalawa. PAO/jpb